Madalas nating marinig ang mga salitang Media at Freedom of Expression o ang malayang pagpapahayag sa panahon ngayon. Ngunit bakit nga ba tila nagiging isang mainit itong usapin sa panahon ng panunungkulan ng ating pangulo na si Pangulong Rodrigo Duterte?
Kamakailan lamang ay naging usap-usapan ang ginawang pag ban ni Pangulong Duterte sa isang reporter ng Rappler (Isang News at Media Website) sa Malacanang Palace na si Pia Ranada. Ang sinasabing rason sa pagbabawal na ito ay nag-ugat sa sinasabi ng Malacanang Palace na ang Rappler raw ay naghahatid ng mga baluktot at di makatotohanang mga balita patungkol sa Pangulo na siya namang taliwas sa una nitong inilabas na dahilan na ang ban daw ay dahil sa desisyon ng Securities and Exchange Commision (SEC) na bawiin ang ibinigay nitong rehistrasyon sa Rappler upang patakbuhin ang kanilang news at media website.
Ang ginawang aksiyong ito ng gobyerno ay nagbunga ng hating mga reaksyon hindi lang sa mga mamamayan kundi pati narin sa mga miyembro ng media sa ating bansa. Marami ang nagsasabi na ang desisyon ng Administrasyong Duterte ay halimbawa lamang ng tinatawag na media oppression na lumalabag hindi lang sa karapatan ng mga miyembro ng media kundi pati na rin sa karapatan ng mga ordinaryong mga mamamayan na maipahayag ang kanilang mga saloobin o ang kanilang freedom of expression.
Sa kabilang banda, maraming mga tagasuporta ang pangulo ang naniniwala na tama lang ang ginawang desisyon ng pangulo na ipagbawal and reporter na si Ranada sa Palasyo at mariin din ng mga itong ipinagtanggol ang pangulo sa kanyang naging desisyon na ika nga nila’y may sapat namang basehan.
Isa sa mga malaking katanungan ngayon ay kung layunin nga ba talaga ng Pangulo na kontrolin hindi lang ang mga balitang lumalabas sa mga pahayagan, radio at telebisyon kundi pati na rin mismo ang mga mamamahayag na naghahatid ng mga ito sa taumbayan. May sapat nga bang kapangyarihan ang gobyerno na hawakan sa leeg ang media lalong lalo na ang mga mamamahayag na tumutuligsa sa mga proyekto at desisyong ginagawa ng kasalukuyang administrasyon?
Panahon na para buksan ang ating mga mata. Ang aksyong ito ng Pamahalaan ay isa lamang halimbawa na sa pamamagitan ng kanilang kapangyarihan ay kayang kaya nilang manipulahin hindi lang ang mga balitang lumalabas at ating nakikita’t nababasa kundi pati narin ang mga taong nagsusulat nito. Ang pangyayaring ito ay isa lamang manipestasyon na kung ang mga malalaking media companies ay kayang hawakan at manipulahin ng administrasyon ay hindi rin nakakapagtaka na sa susunod ay ang mga ordinaryong mga mamamayan naman ang magsusunod-sunuran sa mga mali at baluktot na gawa at gawi ng kasalukuyang pamahalaan.
Nawa’y wag na nating hintayin pang dumating sa punto na tuluyan tayong mawalan ng karapatan upang maipahayag kung ano man ang ating mga saloobin at damdamin sa pamahaalan. Wag na nating hintayin pang dumating ang panahon kung saan ang ating mga tinig at boses ay tila ba hangin nalang na daraan at mawawala nalang sa kawalan. Sa halip gawin natin ang ating mga makakaya upang maipahayag at maipagtanggol ang ating mga karapatan sa pamamagitan ng atin boses at kalayaan. Lahat tayo ay may boses, lahat tayo ay may karapat, bilang mga mamamayan, lahat tayo ay may pakialam at may malaking magagawa para sa ating mahal na bayan.
Comentarios